«Акталган үмүт» — ырлар жыйнагы
Ар-намыс болсун элимде!
Кыргыздар кыргыз деген улут болуп,
Жүрүшкөн көчүп-конуп, булут болуп.
Ар-намысы болбосо кыргыздардын,
Кетишмек аты чыкпай "курут" болуп.
Намыс деген – бул улуттун өзөгү,
Намыс болсо, гүлдөп турат өзөнү.
Ар-намысты бийик туткан адамды,
Туу кылышып кармап турат өз эли.
Бек кармаган ары менен намысын,
Сыйлап турган улуу-кичүү баарысын.
Кылымдарды карытып кыргыз ата,
Жашап келет кенен таштап арышын.
Кыргызды кырдан жыйнап бириктирген,
Болсо экен жигиттери Манасымдай.
Намыстанып жүрөгүн окко тоскон,
Болсо экен Эр Чолпонбай агасындай.
Ар-намыс кыргыз үчүн бийик болгон,
Ар-намыс кыргыздарга болгон коргон.
Кармашып канчалаган душман менен,
Ар-намыс сактап келген нечен жоодон.
Кыргызча көркөм окуу · aibek