«Акталган үмүт» — ырлар жыйнагы
ЭСТҮҮ БОЛУП ӨССӨ ЭКЕН
Түрдүү болот адамдардын беттери,
Бири жука, бири калың эттери...
Калыңында, жукасында талаш жок,
Болсо болду уят-сыйды сезгени.
Уят-сыйды жаштайынан сезген бар,
Нашаа чегип, чымын жандан кечкен бар.
Куул алып ичкиликтин артынан,
Үй-бүлөдөн, ата-энеден безген бар.
Алып турса ата-эненин сабагын,
Тарбиясы жакшы болот баланын.
Ини басат ага баскан жол менен,
Карыга да, жашка да айтып саламын.
Өрнөк кылып улуулардын жаш чагын,
Синдиси өсөт көрүп эже басканын.
Элин-жерин сүйгөндөрдөн болсо экен,
Келечекке кучак жайып жаштарым.
Кыргызча көркөм окуу · aibek